ОРАЛ. 28 маусым. ҚазАқпарат - Бүгін өңірдегі қос облыстық, он бір аудандық газетті біріктіретін, дербес баспаханасы, ақпарат орталығы бар «Жайық Пресс» ЖШС-да баспасөз қызметкерлерінің күніне орай салтанатты жиын болды.
Онда серіктестіктің бас директоры Жантас Сафуллин жиналғандарды мерекемен құттықтап, журналистика ардагерлеріне, сала үздіктеріне алғысхаттар мен ақшалай сыйлықтар табыс етті. Ардагерлер атынан Мәжит Қайырғалиұлы, Мағжан Кенжеғалиев, Сырым аудандық «Сырым елі» газетінің қызметкері Мүсірбек Айташев және басқалар ізгі тілектерін білдірді.
Өңірге танымал кәсіпкер, облыстық мәслихат депутаты Ақсерік Әйтімов «Жайық Пресс» ЖШС ұжымына мейрамға байланысты тілегін жеткізіп, қос бірдей ноутбукті тарту етті.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).