1 қыркүйекте ел мектептері мен колледждерінде буллингке қарсы жоба іске қосылады

АСТАНА. KAZINFORM – 2025 жылдың 1 қыркүйегінен бастап «ДОСБОЛLiKe» буллингке қарсы жобасы еліміздің барлық мектебі мен колледжіне енгізіледі. Бұл туралы ҚР Оқу-ағарту вице-министрі Еділ Оспан айтып берді.

бьуллинг
Фото: Kazinform; DALL-E; Freepik

Вице-министрдің айтуынша, эмоционалды әл-ауқатты нығайту үшін 2022 жылы жәбірлеу (буллинг) ұғымы заңнамалық түрде бекітілген.

− Қазір буллингке қарсы «KiVa» фин бағдарламасы 110 мектепте пилоттық түрде жүзеге асырылып жатыр. Отандық «ДОСБОЛLiKe» буллингке қарсы бастамасы әзірленді, қазір пилоттық жоба 50 мектепте ұйымдастырылып жатыр. 2025 жылдың 1 қыркүйегінен бастап жобаны еліміздің барлық мектебі мен колледжіне енгізу жоспарланып отыр, − деді Е.Оспан Орталық коммуникациялар қызметінде өткен баспасөз мәслихатында.

Сонымен бірге, мектептердегі жәбірлеу әрекеттері үшін балалардың ата-аналарына әкімшілік жауапкершілік күшейтілді.

Мектептердегі психологиялық қызметтер мен мектепішілік есепке алудың бірыңғай қағидалары қабылданды. Бүгінгі таңда есепке алынған балалардың 82%-ы қосымша біліммен қамтылған.

Зардап шеккен балаларға жедел көмек көрсетуге мүмкіндік беретін ведомствоаралық жедел әрекет ету алгоритмдері енгізілген. Сондай-ақ өткен жылы балалардың құқықтарын қорғау саласында 6 негізгі заң қабылданды. Атап айтқанда, балаға қатысты кез келген зорлық-зомбылық үшін жауапкершілік күшейді. Баланы қоғамдық көліктен мәжбүрлеп түсіруге тыйым салынып, оған әкімшілік жауапкершілік көзделді. Құрылыс компанияларын терезелерге құлыптар немесе қауіпсіздік тетіктерін орнатуға міндеттейтін нормалар енгізілді. Бала саудасының алдын алу шаралары қабылданды.

Бала құқықтары жөніндегі уәкіл институтының мәртебесі нығайтылды – елдің әрбір өңірінде оның өкілдері тағайындалды. Қамқоршылық және қорғаншылық органдары мамандарының штат нормативі белгіленді. Тәлімгерлік институты енгізіліп, жетім балалар ересек тәлімгерлердің қолдауын алады.

Айта кетейік, ШҚО-да балаларды буллингтен қорғау үшін арнайы чат-бот іске қосылды.

Соңғы жаңалықтар