20-21 сәуір күндері Қазақстан Президенті Нұрсұлтан Назарбаев Эстонияға мемлекеттік сапармен барады
АСТАНА. 18 сәуір. ҚазАқпарат /Айдар Оспаналиев/ - 20-21 сәуір күндері Қазақстан Президенті Нұрсұлтан Назарбаев Эстонияға мемлекеттік сапармен барады. Бұл туралы бүгін журналистермен болған брифингте Сыртқы істер министрлігінің ресми өкілі Асқар Абдрахманов мәлім етті.
Сапар барысында Елбасы Эстония Президенті Тоомас Хендрик Ильвеспен, Риигикогу спикері (Парламент) Эне Эргмо мен Премьер-Министр Андрус Ансиппен арнайы келіссөздер жүргізіп, елімізбен ынтымақтастықта қызмет етуге мүдделі эстониялық ірі компания жетекшілерімен кездеседі.
Осы кездесулер аясында үкіметаралық, ведомствоаралық деңгейде, сондай-ақ екі елдің коммерциялық компаниялары арасында екіжақты келісімдерге қол қойылады деп күтілуде. Бұған қоса кездесулер кезінде көлік, тасымал, ақпараттық технологиялар, ауыл шаруашылығы сияқты екіжақты қарым-қатынастардың болашағы
зор бағыттары талқыланады. «Эстония Қазақстан үшін Еуропадағы маңызды саяси әрі экономикалық әріптес болып табылады. 2010 жылдың қорытындысы бойынша, екі ел арасындағы тауар айналымы 74,5 миллион АҚШ долларын құрады»,-деді ресми өкіл.
