22 талапкердің нәтижесі жойылды: наурыз айындағы ҰБТ қорытындысы шықты

АСТАНА. KAZINFORM – Наурыз айындағы ҰБТ-ның бірінші аптасында 21 мыңға жуық талапкер тест тапсырды, оқушылардың 57%-ға жуығы шекті балл жинады. Бұл туралы Ғылым және жоғары білім министрлігі хабарлайды. 

Ақпаратта айтылғандай, тестілеу нәтижесі бойынша орташа балл — 53 (5 пән бойынша), ең жоғары балл — 135, оны Абай облысының оқушысы жинады. Тест тапсырушылардың 62,8%-ы қазақ тілін, 37%-ы орыс тілін және 52 талапкер ағылшын тілін таңдады. 

ҰБТ-ға қатысқандардың басым бөлігі, атап айтқанда, 18,4%-ы «Математика-Физика» пәндерін, 16,1%-ы «Шығармашылық емтихан» және 12%-ы «Биология-Химия» комбинациясын таңдаған. Ең аз таңдалған комбинация — «Химия-Физика», оны 35 талапкер таңдады. 

— Наурыздағы ҰБТ-ға 69 ерекше қажеттілігі бар талапкер қатысты. Тестілеу аяқталған соң 30 минуттың ішінде апелляцияға беру мүмкіндігі бар, бұл жағдайда сертификат апелляция туралы шешім қабылданғаннан кейін тестіленушінің жеке кабинетінде қолжетімді. Қазір 22 талапкердің нәтижесі жойылды. Оның ішінде 10 талапкер смартфон және шпаргалка сияқты тыйым салынған заттарды алып өту әрекеті салдарынан тест тапсыру мүмкіндігінен айырылды, ал тестілеу кезінде ережелерді бұзғаны үшін аудиториядан 12 адам шығарылды. Өзге тұлғалар анықталған жоқ, - делінген хабарламада. 

Сондай-ақ министрлік биылғы ҰБТ аяқталғаннан кейін 31 қазанға дейін тестілеудің бейнежазбаларына талдау жүргізіледі. Тыйым салынған заттарды пайдалану немесе ережелерді бұзу фактілері анықталған жағдайда талапкердің ҰБТ нәтижесі жойылатынын ескертті. 

Еске сала кетсек, 1 наурыз бен 6 сәуір аралығында көктемгі ұлттық бірыңғай тестілеу өтеді, оған 163 мыңға жуық талапкер өтінім берген.