382 млн теңге жымқырған қарағандылық Болгариядан экстрадицияланды

АСТАНА. ҚазАқпарат - Бүгін Қазақстанның Бас прокуратурасы мен ІІМ Интерполы халықаралық іздеудегі Максим Леонтьевті қылмыстық жауаптылыққа тарту үшін Болгариядан экстрадициялады, деп хабарлайды ҚазАқпарат ҚР Бас прокуратурасының баспасөз қызметіне сілтеме жасап.

«Ұсталған азамат 2012-2017 жылдар аралығындағы кезеңде Қарағанды облысы Ақтау қаласындағы «Central Azia Cement» АҚ-да өзінің қызметтік жағдайын пайдалана отырып, адамдар тобында алдын ала сөз байласу арқылы кәсіпорынның 382 млн. теңге сомасына ақшалай қаражатын жымқырғаны үшін күдікті», - делінген хабарламада.

Леонтьев қылмыстық қудалау органдарынан жасырынып үлгерген, осыған байланысты оған халықаралық іздестіру жарияланған.

«Күдіктіні экстрадициялау қазақстандық құқық қорғау органдарының болгарлық әріптестерімен үйлесімді әрекеттерінің арқасында мүмкін болды», - делінген хабарламада.

Қазіргі таңда, күдікті Астана қаласының тергеу изоляторына қамалды.