АҚШ-тағы мигранттарды Коста-Рикаға депортациялау: Өзбекстан СІМ үндеу жасады

ТАШКЕНТ. KAZINFORM – Коста-Рика үкіметі АҚШ-тан депортацияланатын 200 заңсыз мигрантты қабылдауға дайын, деп хабарлайды Kazinform агенттігінің меншікті тілшісі.

Мигранттардың басым көпшілігі – Орталық Азия мен Үндістан азаматтары. Аталған мәселеге қатысты пікір білдірген Өзбекстан Сыртқы істер министрлігінің баспасөз хатшысы Ахрор Бурханов барлық азаматқа тиісті көмек көрсетілетінін мәлімдеді.

— Біз БАҚ арқылы басқа елдерге депортациялануы ықтимал Өзбекстан азаматтары жайлы ақпараттарды бақылап отырамыз. Бұл мәселе бойынша еліміздің дипломатиялық өкілдіктері АҚШ тарапынан мәлімет сұратты. Сондай-ақ дипломаттар арқылы Латын Америкасы мемлекеттерімен байланыс орнатылды. Тиісті жауаптарды алған уақытта АҚШ-тағы елшілік қызметкерлері барлық Өзбекстан азаматына толық көмек көрсетеді, - деп мәлімдеді Ахрор Бурханов.

Ол атап өткендей, Өзбекстан мен АҚШ арасында тиісті келісім бар. Оған сай депортациялау тәртібі жолға қойылған. Ахрор Бурхановтың сөзінше, заңсыз мигранттар әдетте Нью-Йорк — Ташкент маршрутымен елге оралады. 

Айта кетейік, АҚШ-та заңсыз жүрген 135 мигрант мінген ұшақ Коста-Рикаға бүгін қонуы мүмкін. Ресми Сан-Хосе Орталық Азия елдерінің азаматтарын өз аумағында 6 аптаға дейін ғана орналастыруға келісті.