Ақтауда жол жиегіндегі техникаға соқтығысқан көлік жүргізушісі қаза тапты
АҚТАУ. KAZINFORM – Қайғылы оқиға 24 қазан күні Ақтау қаласындағы 13 және 14-шағын аудандар арасындағы автожолда болды.
Маңғыстау облыстық полиция департаментінің хабарлауынша, алдын ала мәліметтер бойынша, Toyota Camry автокөлігінің жүргізушісі жолдың шетінде тұрған тиегіш техникамен соқтығысқан.
Жол апатының салдарынан жүргізуші оқиға орнында көз жұмды. Бір жолаушы әртүрлі жарақаттармен ауруханаға жеткізілген.
- Аталған дерек бойынша қылмыстық іс қозғалып, сотқа дейінгі тергеу жүргізілуде. Полиция барлық жүргізушілерді жол қозғалысы ережелерін, жылдамдықты және жолаушыларды тасымалдау кезіндегі қауіпсіздік шараларын қатаң сақтауға шақырады.
Жол қозғалысы ережелерінің бұзылуы ауыр және орны толмас зардаптарға әкелуі мүмкін, - делінген хабарламада.
Бұған дейін, Ақтөбеде екі көлік соқтығысып, 12 адам қаза тапқан болатын
Бүгін Ақтөбедегі жол апатынан зардап шеккен үш адамның облыс орталығына жеткізілгені белгілі болды.
