Ақтөбеде 90 жастағы әже әлі күнге дейін іс тігіп, тары қайнатады
АҚТӨБЕ. KAZINFORM — Ақтөбелік батыр ана Бибіжан Кәдірбайқызы 36 жасында жесір қалып, 9 баланы өзі бақты. Бар болғаны 7 сынып оқып, 20 жыл бойы қой баққан әже Kazinform тілшісіне еңбек жолы мен ұрпағы туралы айтып берді.
Балаларымды ешкімге алақан жаймай өсірдім — 90 жастағы әже
Бибіжан Кәдірбайқызы Ақтөбе облысы Ырғыз ауданының тумасы. Әкесі Кәдірбай жылқышы болды, анасы колхозда еңбек етті. Төрт ағайынды болып өсті. Өткенді еске алған қария атасының еңбекқор, әжесінің шебер болғанын айтып берді.
— Шешем колхоздың бүкіл жұмысшысына аспаз болған адам. Тары қуырып, түйіп, қорек қылды. Екі апам тұрмыс құрып, ағам әскерге кетті. Мен 7 сыныпты ғана оқыдым. Ол кезде 18 жасқа толып, торғай қорыдым. Сөйтіп егін алқабындағы құстарды үркітеміз. Сол кезде біз колхоздың белсенді жұмысшысы едік. Әке-шешеміз де, балалар да жұмыста болды. Сөйтіп 19 жасым тұрмысқа шықтым. Өзім 20 жыл бойы шопанның көмекшісі болдым. Ол кезде 100 қойдан, 135 қозы алдым. 1970 жылы «Қажырлы еңбегі үшін» медалін берді. 1972 жылы жолдасым өмірден өтті. Мен 9 баламен жалғыз қалдым, ешкімнен көмек сұрамадым. Жарма ауылына көшіп келгенде баламның үлкені 9-сыныпта оқыды, кішкентайы 7 ай болды. Үлкен ұлым бізді асырау үшін трактор жүргізушісі мамандығын меңгерді. Кішкентай ғой, тракторға су құюға бойы жетпейтін еді. Су құйып, шығарып салып, жолына қарап отыратын болдым. Бір жыл отырып, жергілікті басшылардан жұмыс сұрап бардым. Үй берді, балам трактор айдады, өзім мектепке аспаз болып орналастым. Қойшылардың балаларына арналған мектеп-интернатта 20 жыл аспаз қызметін атқардым әрі 8 пешке от жағып, күлін шығарамын. Түнімен су тасимын, 31 нан пісіремін. Сонда бар болғаны екі-ақ сағат демалатын едім. Ешкімге алақан жаймай балаларымды өсірдім, — деді қария.
Бүгінде 5 ұл мен 4 қыздан 20-дан астам немере, 50-ден астам шөбере сүйіп отыр. Қария туған-туыстары, көрші-қолаң қиын сәтте көмек бергенін айтты. Тұңғышы Отан алдындағы борышын өтеп келген соң тұрмыс түзеле бастады. Немерелерін білімге құштар етті, тіпті бүгінгі күнге дейін сабақтарын оқытады. Өзі секілді балалары мен немерелері де шебер, қолынан іс келеді.
— Өмірге өкпелемеймін, бәрі аяқтанды, отбасылы болды. Өзгесі тағдырдың ісі. Балаларым жастайынан еңбектеніп өсті. Сиыр сауды, сүттен түрлі тағам дайындады. Балаларым ғана емес, келіндерімнің де қолынан іс келеді. Өзім 50 жасымда бала санымен зейнетке шықтым. Бірақ зейнетке шықтым деп қарап отырмадым. Қалаға көшіп келдім. Сөйтіп қазір тұрып жатқан үйдің иесі жерін сататынын естідім. Ақшам болмаған соң Ойылдың тарысынан 12 қап алып, қуырып, сатып, зейнетақымды қосып, 30 мың теңгеге алдым. Балалар үй салды, бақша да ектім. Қазір де картоп, қияр мен қызанақ егемін, арамшөбін жұламын, суарамын. Ол жұмыстарға балалар да көмектеседі. Тары да қайнатамын. Маған бұл ермек, — деді Бибіжан Кәдірбайқызы.
Кейуананың өз тігін машинасы бар. Ол атасының сыйлығы, мұрасы. Содан бері жанынан тастамай, бар баласын киіндірді, өз балаларымен қоса, ауыл балаларына, үлкендерге қалағанын тігіп берді.
— Ауылдағы дүкенге екі тігін машинасы түсті. Атам тұңғыш немересі өмірге келгенде басшылардан сұрап, маған сыйлыққа берді. Сол сыйлықты бергеніне 70 жыл толды. Өзім барлық киімді тіге беремін, әлі күнге дейін құрақ құраймын. Қыздарымның жасауын өзім жасадым. Әлия Молдағұлованың 70 жылығына арналған киіз үйдің бар жасауы біздің қолымыздан шықты. Тәрбие — адамның басында. Басы істейтін адам тәрбиеге қарамайды. Мен балаларыма олай-бұлай деп айтпадым. Біреуі бетіме келмей, малға қарады, үй жинады, су тасыды, тамақ істеді. Бір-біріне бауырмал, берекелі. Балаларым жесір қалғанымды білдірмеді. Еңбек керек. «90 жасқа келудің себебі не?» деп сұрады менен. 90 жасқа жетудің себебі теңкиіп жату емес, еңбек. Күні-түні жұмыс істеу. 2 сағат ұйықтаған күндерім болды. Соның арқасында 90-ға келіп отырмын, — деді кейуана.
Әлеуметтік желіден көріп, іздеп келдім — Баршагүл Омарбекова
«Қазақ аналары — дәстүрге жол» қоғамдық бірлестігінің мүшесі Баршагүл Омарбекова Бибіжан Кәдірбайқызының тары қуырып отырған видеосын әлеуметтік желіден көріп, іздестірді. Кейін тауып алып, үйіне барды.
— Әженің өмірі ұрпаққа үлгі екенін айтып, көпшілікке танытқым келді. Қолөнер шебері және ұлттық тағам шебері. Бірімізге-біріміз айтып, таңқалдық. Қазіргі кезде Бибідан әже — аңыз әже.Таяуда ғана 90 жасын атап өтті, кездесу ұйымдастырылды. Әженің бойындағы төзімділігі, шеберлігі — асыл қасиеттері. Көрген-түйгені бар адамдар ғана осы қасиетке ие. Бұл кісі еңбек ардагері, тыл ардагері. Бала кезінен қиындық көріп, пісіп, 9 баламен жесір қалса да күресіп, қазір зейнеттің рахатын көріп отыр. Қанша қиындық көрсе де сынбады, — деді Баршагүл Омарбекова.
Қазіргі кезде Бибіжан Кәдірбайқызының кеудесінде 5 медаль жарқырайды. Оның бірі Күміс алқа, екіншісі Алтын алқа. Ал тағы екеуі Жеңістің 65 және 70 жылдығына арналған төсбелгі. Өзге байлығы — қаумалаған бала-шағасы, немере-шөбересі.
Айта кетелік Атырауда жол ережесін еш бұзбаған таксист әже туралы жазған едік.
