Ақтөбеде қайықпен қатынап жүрген ауданға техникалық көпір салынып жатыр

АҚТӨБЕ. KAZINFORM — Техникалық көпір құрылысы 3 күнде аяқталады. Қазір аудан тұрғындарын өзен арқылы өткізуге 5 қайық шығарылды.

Ақтөбе облысы Ойыл ауданының орталығында тұрақты қатынасты қалпына келтіру үшін техникалық көпір салынып жатыр. Төтенше жағдайлар қызметі болса 3 күнде 350-ге жуық адамды қайықпен тасымалдады. 

— Бүгінгі таңда облыс аумағындағы су тасқыны жағдайы тұрақты. Ойыл ауылының кіреберісінде көпір салынып жатыр. Жергілікті атқарушы органдардың мәліметтеріне сәйкес техникалық көпірдің құрылысын 3 күн ішінде аяқталуы жоспарланған. Құтқарушылар өзен арқылы 348 адам, оның ішінде 49 баланы өткізді. Ойыл ауылында 70 адам, 28 техника, 5 жүзу құралынан тұратын күштер жұмылдырылған. Тұрғын үйлер мен саяжайларды, ғимараттар мен құрылыстарды су басу фактісі тіркелген жоқ. Елдімекендерге қауіп жоқ, — деп хабарлады облыстық ТЖД баспасөз қызметі.

Еске салсақ, 15 наурыз күні Ойыл ауданына кіреберістегі уақытша өткелді су шайды. Бұл аудандағы көпір былтыр тасқында зақымданды. Биыл сараптама қорытындысы шығып, қалпына келтіретін мердігер анықталды.