Ақтөбеде нөсер жауыннан соң 100-ден астам ассенизатор тәуліктік кезекшілікке шығарылды
АҚТӨБЕ. KAZINFORM — Облыс орталығында үш күнде айлық нормаға жетер жаңбыр жауды. Қазіргі кезде су сору жұмыстарын жүргізетін мердігерлер тәуліктік кезекшілікке шықты.
Ақтөбе қаласы Астана ауданының әкімі Баянбек Қырықбаев қалада су сору жұмыстары үздіксіз жүріп жатқанын хабарлады. Нөсер жауын кезінде жаяу жүргіншілермен қатар көлік қозғалысына қиындық келтіріп жатыр.
— Қалада жаңбыр екі аптадан бері тоқтамастан жауып тұр. «Қазгидромет» РМК АОФ мәліметі бойынша осы уақыт аралығында жарты жылдық мөлшерде жаңбыр жауды. Мысалы жауын-шашынның бір айлық нормасы 30 миллиметр болса, соңғы үш тәулікте 23 миллиметр жауды. Қазіргі уақытта қала көшелерінен суды сорғылау жұмыстары жүріп жатыр. 100-ден астам ассенизатор тәуліктік кезекшілікке жұмылдырылды. Сонымен қатар сорғы станциялары жұмыс істеп жатыр. 109 байланыс қызметі тұрғындардан өтініштер қабылдайды, — деді Астана ауданының әкімі Баянбек Қырықбаев.
Ақтөбе облыстық ТЖД-нің баспасөз қызметі ертең де қалада жаңбыр жауып, найзағай ойнайтынын хабарлады. Облыстың батысында, солтүстігінде, орталығында бұршақ жаууы мүмкін. Желдің екпіні 15-20 м/с болады. Ақтөбе қаласында да жаңбыр жауады.
Айта кетейік, Атырауда да 1–3 маусым аралығында айлық жауын-шашын нормасынан 1,5 есеге артық жаңбыр жауды.
