Ақтөбеде жаңбыр кезінде асфальт опырылып, көпқабатты үйде кәріз суы кері ақты

АҚТӨБЕ. KAZINFORM - Ақтөбе қаласында да нөсер жаңбыр жауып, көпқабатты үйде кәріз суы унитаз, ваннадан кері ақты. Ал орталықтағы Ағайында Жұбановтар көшесінде жол опырылып түсті.

Ақтөбе қаласында кеше нөсер жауын жауды. Қала тұрғынының айтуынша, Бөкенбай батыр 157 мекенжайында орналасқан «Авиатор» тұрғын үй кешенінде кәріз суы кері ақты.

«Жаңбыр кезінде кәріз жүйесінен ақау шығып, унитаздан, ваннадан кері ақты су. Үш сағат бойы еш көмек болмады», - деді қала тұрғыны Шыңғыс Бейсатов.

Сонымен бірге Ағайында Жұбановтар көшесінде жол опырылып түсіп, коммуналдық мекеме айналаға белгі қойып, жол бөлігін уақытша жапты. 

Айта кетейік, нөсер жауын кезінде Алтын орда шағын ауданында да қатынас қиындады. Көліктер суда қалып, адамдар үйінен шыға алмады.