Ақтөбелік шаруалар қора мен шаруашылықтағы үй шығынын өтеуді сұрайды
АҚТӨБЕ. KAZINFORM – Ақтөбелік шаруалар су тасқыны кезінде бұзылған қорасы мен үй шығынын өтеп беруді сұрап отыр. Әзірге оларға бағалау жұмыстары жүргізілмеді.
Ақтөбе облысы Ырғыз ауданындағы «Н-Сыдық» шаруа қожалығының басшысы Шыңғыс Оспанов арада 4 ай өткенде ғана қорасы мен қожалықтағы үйін барып көрді. Осы уақытқа дейін эвакуациялық бекетті, кейін тума-туыстары мен жалдамалы пәтерді паналап жүрген ол жарамсыз болып қалған мүлік шығыны қашан өтелетінін білмейді.
«Шаруашылыққа 4 айдан кейін келіп тұрмын. Мұнда бұрын ештеңе болмағандай күйде тұр. Айналаның бәріне шөп өсіп кеткен, жол жоқ. Қыстан қалған 500 бума шөп бар еді. Қазір тек 100 бумасы қалған. Шөп шабатын техникамыз суда қалды. Трасформатор жанып, істемей қалды. Күн батареясы да жарамсыз күйде тұр. Бізге көмек керек. Шығынымыз 17-18 млн теңге болып тұр. Бізге шығынды есептеуге адам келмеді», - деді «Н-Сыдық» шаруа қожалығының басшысы Шыңғыс Оспанов.
Оның айтуынша, су 2 метрге көтерілген. Қазіргі кезде де әр жерде су жиналып тұр.
«Біз үйдегі тұрмыстық техникамызды алып шыға алмадық. Бұл шаруашылық болғанымен, біз осында тұрдық. Енді қазір қайда барып, кімнен көмек сұрайтынымызды білмейміз»,- деді Шыңғыс Оспанов.
Ойыл ауданының тұрғыны Андрей Хамитұлының хабарлауынша, бір айға жуық уақыт бұрын құжаттарды жинап, үй мен қора шығыны өтелетіні айтылған.
«Үйге 5 млн, қораға 3 млн теңгеден береміз деп айтты. Бірақ әзірге ақша аударылмады. Әлі күнге дейін адамдар вагонда, ағаш үйде отыр. Кімге барып, кімнен көмек сұрарымызды білмейміз», - деді Андрей Хамитұлы.
Ақтөбе облыстық Ауыл шаруашылығы басқармасының басшысы Құсайын Сәрсембайдың айтуынша, облыс шаруаларының жалпы шығыны 725 млн теңге болып тұр. Әзірге ешқайсысына ақша аударылмады.
«Қазіргі кезде бәрінің шығыны есептелді. Кей шаруаларға бағалау комиссиясы бармады деген мәселеге келер болсақ, оны ауданның әкімдігі шешеді. Бізге қандай бағасын береді, төлмейміз. Бірақ бүгінде қорда ақша жоқ. Ол тек қордан төленетін шығын. Себебі ол шығынды өтеу туралы ешқандай ереже жоқ. Біз «Парыз» қорына ақша түскенін күтіп отырмыз. Облыс әкімі жақын маңда ақша түсетінін айтты. Шығын барлық ауданда бар. Басым бөлігі Ойыл мен Ырғызда», - деді Құсайын Сәрсембай.
Оның айтуынша, құжаты реттелмеген мал шығыны осы қор арқылы өтелген. Қазір бұл жұмыс аяқталған.
Айта кетейік, Ақтөбе облысында көктемгі су тасқыны кезінде 1 мыңнан астам үй жарамсыз болып қалды. Қазір аудандардың бәрінда дайын үй сатып алу жұмысы аяқталды.
