Ақтөбенің Ойыл ауданына кіреберістегі уақытша өткелді су шайды

АҚТӨБЕ. KAZINFORM — Ойыл ауданындағы уақытша өткелді су шайып, қалпына келтіру жұмысы жүріп жатыр.

Ойыл ауданында кіреберіс көпір бұзылып, былтыр уақытша өткел салынған еді. Сол өткелді қарғын су шайып кетті.

— Былтырғы су тасқынында зардап шеккен негізгі көпірдің жөнделуіне байланысты тұрғындардың қатынасы үшін 1 шақырым жерден уақытша өткел салынған еді. Бүгін өзендегі қар суы еріп, өткелді су басты. Қазіргі уақытта қалпына келтіру жұмыстары жүргізілуде. Бір тәуліктің ішінде қатынас қайта ашылуы тиіс. Жергілікті тұрғындардың өзен арқылы өтуіне жағдай жасалып жатыр, — деп хабарлады Ойыл ауданы әкімдігі.

Қазіргі кезде адамдар арғы бетке жаяу өте алады. Ойыл ауданының әкімі Асқар Қазыбаевтың айтуынша, Ойыл өзенінің деңгейі көтерілген.

Еске салсақ, Ақтөбеде су шайған, су өткен жол, көпірді жөндеуге 15 млрд теңгеден астам қаржы қажет. Бір ғана Ойыл ауданына кіреберіс көпірді қалпына келтіруге 4 млрд теңгеге жуық қаржы жұмсалмақ.