Светлана Жақыпова әлеуметтік қызметтерді лицензиялау кезінде анықталған кемшіліктерді атады

АСТАНА. KAZINFORM – Еңбек және халықты әлеуметтік қорғау министрі Светлана Жақыпова цифрландырудың арқасында қағаз жүзінде негізсіз жазылған мәліметтер анықталып жатқанын айтты.

- Біз әлеуметтік қызметтерді лицензиялауды жүзеге асырдық. Бұл процедура бірқатар келеңсіз аспектілерді анықтады. 2009 жылдан бастап кейбір ұйымдар қызмет көрсеткен, бірақ талаптарға сай болмады. Атап айтқанда, бүгінде 500-ге жуық лицензиясы бар ұйым осы сапаны қамтамасыз етуі тиіс, - деді С. Жақыпова Сенат жанындағы мәслихаттармен өзара іс-қимыл жөніндегі кеңестің кеңейтілген отырысында.

Оның айтуынша, Премьер-министрдің тапсырмасы аясында лицензиялау мәселесі бойынша министрлік барлық саладағы әлеуметтік инфрақұрылым субъектілерінің қызметін толығымен цифрландырып жатыр. Бұл жоба Шымкентте жүзеге асырылып отыр.

- Осы цифрландыру балалар үйлеріне, жетімдер үйлеріне, кәмелетке толмағандарды бейімдеу орталығына, түзету орталықтарына қатысты. Мұндағы басты мақсат – жергілікті атқарушы органдардың бюджеттерінде тиімді бөлуді қамтамасыз ету. Әлеуметтік қызметтерге қатысты нақты көрсеткіштерді айтсақ, мемлекеттік бюджетке 31 млрд теңгеге жуық қаржыны қайтардық. Бұл қалай болды? Себебі тек қағаз жүзінде негізсіз есептер болған. Цифрландыру бойынша жұмыстарды атқару кезінде әлеуметтік қызмет көрсетті деген 1039 ұйым туралы мәлімет ұсынылған, ал іс жүзінде олардың 800-ге жуығы қалған. Соның ішінде 500-іне лицензия бердік, қалған 300-іне талапқа сай емес деп бас тарттық. Қағаз жүзінде қызмет көрсетіліп жүр деген мәліметтермен 135 мыңға жуық адамға қатысты есеп ұсынылған, алайда 82 мың адамға қызмет көрсетілгені нақтыланды, - деді ведомство басшысы.

Бұдан бұрын хабарланғандай, бүгін елордада Сенат жанындағы мәслихаттармен өзара іс-қимыл жөніндегі кеңестің кеңейтілген отырысы өтті.