Алматы қаласының мәслихатына жаңа депутат сайланды

АЛМАТЫ. KAZINFORM — Қазақстан Республикасының «Сайлау туралы» Заңына сәйкес, «Ақ жол» ҚДП тізімі бойынша Алматы мәслихатының депутаттық мандаты Асқар Қуандықұлы Бискультановқа берілді.

Мәслихаттың өткен сессиясында «Ақ жол» партиясының депутаты Олжас Нұралдинов өзінің жеке өтініші негізінде өкілеттігін мерзімінен бұрын тоқтатқан болатын. Нәтижесінде депутаттық корпус құрамында бос орын пайда болды.

Асқар Бискультанов өзінің кәсіби еңбек жолын Еуразиялық даму банкінен бастаған. Онда жетекші маман және жобалық топтың менеджері қызметін атқарған. 2013 жылдан бастап құрылыс саласында жетекшілік қызметтерді атқарып келеді, оның ішінде «Темірбетон-1» ЖШС-ның бас директоры лауазымы бар.

Сонымен қатар, ол — Қазақстан темірбетон өнімдерін өндірушілер қауымдастығының төрағасы.

2021–2023 жылдар аралығында Алматы қаласы Мәслихатының VII сайланымының депутаты болған.

Еске салайық, бұған дейін «Аmanat» партиясының тізімі бойынша мәслихат депутатының бос мандаты Кристина Бекмырзаеваға берілгенін жазғанбыз.