Алматы маңындағы тауда тас құлап жарақат алған жасөспірім құтқарылды

АЛМАТЫ. KAZINFORM – Алматы қаласы ТЖД құтқарушылары Титов шыңында жарақат алған жасөспірімді құтқару операциясын жүргізді.

Кеше «Тұйық су» бақылау-құтқару пунктінен құтқарушылар Медеу ауданындағы Титов шыңына аттанған. Онда үш бала мен бір ересек тауға көтерілген. Таудан түсу кезінде 2009 жылы туған жасөспірімге тас құлап, білегінің ашық сынуы тіркелген.

- Құтқарушылар зардап шегушіге алғашқы медициналық көмек көрсетіп, іздестіру-құтқару бекетіне жеткізді. Ол ТЖМ Апаттар медицинасы орталығының дәрігерлеріне тапсырылды. Жағдайы тұрақты, есі орынды, өздігінен жүре алады, - делінген ақпаратта.

ТЖМ тасты жерлерде сақ болу, бөртпелерден аулақ жүру және тастардың құлау қаупі бар жерлерде басқа адамдардың астында көтерілмеу қажеттігін ескертеді.

Айта кетейік, Титов шыңы теңіз деңгейінен шамамен 3800 метр биіктікте орналасқан және Алматы маңындағы танымал туристік бағыттардың бірі саналады.

Бұған дейін Алакөлде 14 адам, оның ішінде 8 бала құтқарылды.