Алматы зираттарына 400 бейнебақылау камерасы орнатылады

АЛМАТЫ. KAZINFORM — Қаладағы зираттарға 400 бейнебақылау камерасын орнатуға 582 млн теңгеден астам қаражат бөлу жоспарда.

Алматы қалалық цифрландыру басқармасы мемлекеттік сатып алу порталына 400 камера сатып алуға және оларды жерлеу орындарына орнатуға хабарландыру жариялады. Жобаны жүзеге асыруға 582,4 млн теңге қажет. 

Құжатта сатып алынатын қызметтердің мақсаты — ақпарат алу, бақылау және тіркелген бұзушылықтар туралы төтенше жағдайлар қызметтерін жедел хабардар ету, сондай-ақ қоғамдық қауіпсіздік деңгейін арттыру, қоғамдық тәртіпті сақтау және Алматы қаласының зираттарында вандализм деңгейін төмендету екені айтылған.

Еске салайық, былтыр Жамбыл облысында зират қоршауын ұрлап жатқан екі адам ұсталған болатын.

Бұған дейін Кеңсай зиратындағы өрттен 60 молаға залал келгені туралы жазған едік. 

Алматыда жерлеу қызметі қанша тұратынын мына сілтемеге өтіп біле аласыздар.