Алматыда «Damubala» бағдарламасына сапалы қызмет көрсетушілер ғана қатыса алады

АЛМАТЫ. KAZINFORM – Алматыда «Damubala» бағдарламасына қатысты жүйелі тәртіп орнатылады. Онда тек сапалы қызмет көрсететін жеткізушілер жұмыс істей алады. Бұл туралы қала әкімі Ерболат Досаев Медеу ауданының тұрғындарымен кездесу барысында мәлім етті. Шаһар басшысы Алматы - «Damubala» бағдарламасына жеткілікті көлемде ақша бөлген жалғыз өңір екенін атап өтті.

«Көп өңір бағдарламаны қысқартты. Бізде қалаға 16,5 млрд теңге бөлінді. Әкімдік бағдарламаны үнемі қолдап отырады және оны жақсарта түсеміз», - деді әкім. 

Сондай-ақ, әкім Аrtsport платформасынан Damubala платформасына көшу кезінде ескі ваучерлер қалғанын, олар осы жылдың соңына дейін жарамды екенін айтты. 

«Жаңа жылда – жүйелі тәртіп пен адал қызмет көрсететін кәсіпкерлерден тұратын жаңа ваучерлер болады. Бағдарламаны қуана қолдаймын және қажет болса бағдарламаны кеңейту үшін қосымша қаржы көздерін табамын. Біз өткен жылдың екінші жартысынан және осы жылдан бастап сапалы қызмет көрсетушілерді табуға тырысамыз», - деді әкім. 

Сондай-ақ, қала басшысы қаржы басқармасы мен Медеу ауданының әкімдігіне кәсіпкерлерге,  «Damubala » бағдарламасы бойынша қызмет көрсетушілерге ақша төлеуге қатысты мәселелерді шешуді тапсырды.

«Біз тамыз айының соңына дейін барлық актіні салыстырып тексеріп, төлем жасаймыз», - деді аудан әкімі Еркебұлан Оразалин.

2023 жылдың сәуір айында орталықсыздандыру аясында аудан әкімдіктеріне «Damubala » бағдарламасы бойынша мемлекеттік шығармашылық және спорттық тапсырысты іске асыру тапсырылған еді.