Алматыда екі көпқабатты автотұрақтың жобасы әзірленіп жатыр

АЛМАТЫ. KAZINFORM – Алматыда алдағы уақытта көпқабатты автотұрақтар салынады.

Қалалық мобильділік басқармасына қарасты Almaty parking мекемесінің мәліметінше, мегаполисте бүгінгі күні тротуар түріндегі 12 мың орын, алаң түріндегі 6 мың орын автотұрақ бар. Қала бойынша тұрақтардың бағасы - сағатына 100 теңге. Тек Жасыл базар аумағының жанында 150 тг/сағат құны қойылған.

Аудан бойынша автотұрақ саны ең көп аудан - Алмалы, мұнда алты мыңға жуық тұрақ орналасқан. Ал автотұрақ ең аз орналасқан аудан – Наурызбай ауданы, мұнда 75 орын бар.

Kazinform сауалына жауап берген Almaty parking мекемесі Алматыға алдағы уақытта тұрақтар саны көпқабатты автотұрақ есебінен көбейетінін мәлімдеді.

- Қалалық кеңістікті тиімді пайдалану, көлік инфрақұрылымын жақсарту және автотұрақ орындарының тапшылығы мәселелерін шешу мақсатында «Алматы паркинг» КМК Медеу ауданы әкімі аппаратымен және Алматы қаласының Қалалық мобильділік басқармасымен бірге «Самал-1» шағын ауданында жер учаскесін таңдады. Бұл жер учаскесі көпқабатты механизацияланған автотұрақтарды салу үшін жобалық-сметалық құжаттама әзірлеуге берілді. Жұмыс жобасына сәйкес, аулалық аумақтардың жүктемесін босату үшін 48 көлікке арналған механизацияланған автотұрақ ұйымдастыру жоспарланып отыр, - деп хабарлады мекемеден.

Одан бөлек Almaty parking жауабына сәйкес, Алматы қаласының Құрылыс басқармасы қазіргі уақытта «Көктем-3» шағын ауданында (Бостандық ауданы) көпқабатты автотұрақты салуға арналған жобалық-сметалық құжаттаманы әзірлеу жұмыстарын аяқтап жатыр. Бұл автотұрақ 207 көлік орнына арналған алғашқы коммуналдық автотұрақ болмақ.

Еске салайық, бұған дейін Алматыда 16 жылдай құрылысы тоқтап тұрған көпқабатты автотұрақ сүрілгенін жазғанбыз.