Алматыда LEZ жобасы аясында жол белгілері орнатылып жатыр
АЛМАТЫ. KAZINFORM – Алматыда төмен эмиссия аймағының (LEZ) пилоттық жобасы аясында жол белгілері мен ақпараттық тақталарын орнату жұмыстары басталды.
«Алматы паркинг» ШЖҚ КМК хабарлауынша, ақпараттық құрылымдар Бөгенбай батыр – Желтоқсан – Абай – Достық көшелерінің аумағындағы пилоттық аймаққа кіреберістерде орналастырылып жатыр.
Жоба аясында жалпы саны 134 жол белгісі мен ақпараттық тақта орнату көзделген. Олардың қатарында төмен эмиссия аймағына кіреберісті білдіретін 5.50 экологиялық жол белгілері, аймақтан шығуды көрсететін 5.51 белгілері, сондай-ақ жол қозғалысына қатысушыларға арналған ақпараттық тақталар бар.
Мекеме өкілдерінің мәліметінше, жол белгілерін орнату биыл 28 сәуірде басталған LEZ жобасының техникалық пилоттық кезеңінің бір бөлігі саналады. Қазіргі кезеңде көлік қозғалысына ешқандай шектеу қойылмайды, айыппұл салу немесе аймаққа кіру үшін төлем алу қарастырылмаған.
– Пилоттық жобаның негізгі мақсаты – цифрлық инфрақұрылымды сынақтан өткізу, көлік легін есепке алу жүйелерін баптау, сондай-ақ көліктің атмосфералық ауа сапасына әсерін бағалау үшін деректерді жинау және талдау, - делінген хабарламада.
Мамандардың айтуынша, пилоттық режим цифрлық сервистердің, ақпараттық жүйелердің және әкімшілендіру тетіктерінің жұмысын жобаны одан әрі дамыту жөніндегі шешім қабылданғанға дейін тексеруге мүмкіндік береді.
Айта кетейік, техникалық пилоттық кезең 2026 жылы 31 желтоқсанға дейін жалғасады. Осы уақыт аралығында аймақ аумағындағы көлік қозғалысы қалыпты режимде жүзеге асырылады.
Еске салайық, бұған дейін алматылық жүргізушілерге LEZ аймағына кіргені туралы хабарлама келе бастағанын жазғанбыз.
