Алматыда референдумға дайындық қалай жүріп жатыр
АЛМАТЫ. KAZINFORM — Алматыда АЭС құрылысына байланысты өтетін жалпыхалықтық референдумға қызу дайындық жүріп жатыр. 6 қазан күні мегаполисте барлығы 624 сайлау учаскесі есігін ашады. Осындай сайлау учаскелерінің біріне Kazinform фотожурналисі барып, дайындық барысын камера объективіне түсіріп алды.
Қаланың аумақтық сайлау комиссиясының төрағасы Айгүл Қалықованың айтуынша, Алматыда шамамен 1 260 000 сайлаушы тіркелген. Бас-аяғы 624 сайлау учаскесі құрылды.
Оның 549-ы азаматтарды тұрақты тіркеу орындары бойынша болса, ал 75-і — ауруханалар, санаторийлер және әскери бөлімдер сияқты уақытша орналасқан орындар.
— Дайындық қарқынды жүріп жатыр. Орталық сайлау комиссиясы бізге әрекет етудің негізгі іс-шаралар жоспарын жасады. Бұл сайлау науқанында халықты тегі мен мекенжайы бойынша ақпараттандыру міндеті қойылды. Барлық бірегей мекенжайларға тексеру жүргіздік, оның саны — 495 мыңға жуық. Сондай-ақ, көппәтерлі үйлердегі кіреберістердің санын білеміз, қала бойынша 26 мыңға жуық. Әр сайлаушыға есікке дейін жеткізетін жеке шақыру дайындадық. Сонымен қатар, әр кіреберістің есіктерінде ақпаратты алуға және ЖСН бойынша өз учаскесінің нөмірін тексеруге мүмкіндік беретін QR-код бар плакаттар жапсыру қарастырылған. Бұл қызмет барлық азаматтар үшін қолжетімді, — деді АСК басшысы.
Шақыру қағаздарын әрбір мекенжай бойынша еріктілер мен сайлау комиссияларының мүшелері жеткізеді. Жұмыс мүлік иелерінің бірлестіктері, пәтер иелері кооперативі және жергілікті полиция қызметімен тығыз өзара іс-қимылда жүзеге асырылады. 26 қыркүйектегі жағдай бойынша сайлаушылардың шамамен 40%-ы шақыру қағаздарын алған.
— Біз сайлаушылар тізімін қалыптастыру бойынша біраз жұмыс жүргіздік. Заңға сәйкес, референдумға қатысуға құқығы бар азаматтардың тізімін бізге жергілікті атқарушы органдар дауыс беруден кемінде 20 күн бұрын береді. 21 қыркүйектен бастап барлық тізімдер жасалды және әрбір азамат өзінің тізімге енген-енбегенін тексере алады. Егер тұрғын өзін тізімнен таба алмаса, қосылуға өтініш бере алады, — деп түсіндірді ол.
Сондай-ақ, 172 учаскеде тіркеуді тексеру сервистері орнатылады. Олар дауыс берушілер өзін тізімінен таппаған жағдайда қолданылады.
Егер азамат Алматы қаласында тіркелген болса, ол референдумның белгілі бір учаскесінде дауыс берушілер тізіміне енгізіледі.
— Референдумның 40 учаскесінде Қазақстанның еш жерінде тіркелмеген азаматтарды тіркеу бойынша сервистер ашылады. Бұл бір күндік тіркеу болады. Осылайша, оларға 6 қазандағы референдум күні дауыс беруге мүмкіндік беріледі. Яғни, қазір әрбір азаматтың дауыс беруге мүмкіндігі болуы үшін барынша жағдай жасалып жатыр, — деді Айгүл Қалықова.
Алматыда сайлаушыларға сайлау учаскелері мен олардың мекенжайларына қатысты ақпарат беру үшін бірыңғай 1315 нөміріндегі қалалық сall-орталық іске қосылды. Call-орталық күн сайын демалыссыз 08:00–ден 20:00–ге дейін жұмыс істейді.
Сонымен қатар, сайлаушылар Open Almaty қоғамдық қабылдау бөлмесінің сайтында Telegram bot арқылы сайлаушылар тізімінде өзін тексере алады.
АСК төрағасының айтуынша, қаладағы барлық сайлау учаскелері референдум өткізуге толық дайын. Дауыс беруге арналған орындар қажетті сайлау құжаттарымен, жадынамалармен және ҚР Орталық сайлау комиссиясының нормативтік актілерімен жарақтандырылған.
Оған қоса, әр учаскеде дауыс беру күні бақылаушыларға ыңғайлы болуы үшін ксерокс қойылған.
Сондай-ақ, ерекше қажеттіліктері бар адамдар референдумға өз бетінше қатыса алатындай тиісті жағдай жасалған. Әрбір сайлау учаскесінің кіреберісі пандуспен және тактильді көрсеткіштермен жабдықталған.
Мүгедектігі бар адамдар үшін арнайы бұрыштар мен кең кабиналар ұйымдастырылған, сондай-ақ автомобильге арналған орындар қарастырылған. Зағип азаматтар үшін арнайы трафареттер әзірленді.
— Дауыс беру күні референдум учаскесіне мүгедектігі бар адамдарды инватакси тасымалдайды. Сонымен қатар, Isker қолдау орталығы ҚҚ ұсынысы бойынша дауыс беру күні онлайн-форматта учаскелік комиссия мүшелері мен құлағы естімейтін сайлаушылардың өзара іс-қимылына көмектесетін сурдоаудармашылардың ерікті жұмысы ұйымдастырылады, — деп атап өтті Айгүл Қалықова.
Айта кеткен жөн, сайлау күні азамат денсаулығына байланысты немесе науқас отбасы мүшесінің күтіміне байланысты сайлау орнына келе алмаса, ол жергілікті уақыт бойынша сағат 12:00–ден кешіктірмей жазбаша өтініш беруі керек. Бұл жағдайда учаскелік комиссия оның тұрғылықты жері бойынша дауыс беруді ұйымдастырады.
Дауыс беру күні барлық сайлау учаскелері 07:00–ден 20:00–ге дейін жұмыс істейді. Алайда, әскери бөлімдер, ауруханалар мен санаторийлер сияқты уақытша болу орындарында орналасқан 75 учаскеде дауыс беру сағат 06:00–ден басталады.
Референдумға тартылған учаскелік комиссиялар мүшелерінің жалпы саны — 4362 адам, ал аумақтық комиссиялар мүшелері — 63 адам.
Осылайша барлығы 4425 адам дауыс беруді қамтамасыз етеді.
Еске салайық, бұған дейін сауалнама нәтижесі бойынша қазақстандықтардың 60%-ға жуығы референдумға қатысуға дайын екенін жазғанбыз.
