Алматыда жер сілкінісі кезінде дүрбелеңге жол берген бірқатар басшы қатаң жауапқа тартылды

АСТАНА. KAZINFORM – Алматы қаласындағы жер сілкінісі кезінде тиісті әрекет етпеген Төтенше жағдайлар министрлігі мен қалалық Төтенше жағдайлар департаментінің бірқатар лауазымды тұлғалары жауапқа тартылды.

 «Алматы қаласында жер сілкінісі кезінде бөлімшелердің тиісінше әрекет етпеу фактісі бойынша Төтенше жағдайлар министрлігі жүргізген қызметтік тергеу нәтижесінде 14 қызметкер қатаң жауапқа тартылды. Оның ішінде министрліктің 4 басшысы, сондай-ақ олардың 5 орынбасары, 1 ведомстволық бағынысты ұйымның басшысы, аумақтық бөлімшенің басшысы және оның орынбасары бар», - делінген ТЖМ баспасөз қызметі таратқан хабарламада. 

Сондай-ақ, онда Төтенше жағдайлар министрлігі мен Төтенше жағдайлар департаментінің 2 басшысына қатысты жауапкершілік ертерек өндіріп алумен шектелгені жазылған. 

Айта кетсек, бұған дейін Алматы қаласындағы жер сілкінісі кезінде дұрыс әрекет етпегені үшін ТЖМ-де қызметтік тергеу жүретіні айтылған еді.

Еске сала кетейік, қаңтар айынан бері Алматы тұрғындары жер сілкінгенін жиі сезіп келеді. 

Сондай-ақ, сейсмологиялық бақылау және зерттеу ұлттық ғылыми орталығы биыл Қазақстан аумағында жойқын жер сілкінісі болмайтынын жеткізді.