Алматы декларациясының 35 жылдығына орай халықаралық конференция өтеді - Ерік Байжүнісов

АСТАНА. 3 қазан. ҚазАқпарат - Биылғы 6-7 қарашада Алматыда Дүниежүзілік денсаулық сақтау ұйымының ұсынысымен Алматы декларациясының 35 жылдығына орай халықаралық конференция өтеді. Бұл туралы бүгін ҚР Президенті жанындағы Орталық коммуникациялар қызметіндегі баспасөз мәслихатында ҚР Денсаулық сақтау вице-министрі Ерік Байжүнісов мәлім етті.

Оның сөзіне қарағанда, бұл жиынға әлемнің жетпіске жуық елінен мамандар келеді деп күтілуде.

Айта кетейік, осыдан 35 жыл бұрын алғаш рет әлемнің 157 мемлекеті «Алматы декларациясы» атты үлкен құжатты қабылдап, осы құжат әлем мемлекеттеріне таралған болатын. Яғни онда Алғашқы медициналық-санитарлық көмекке (АМСК) басымдық беріліп, барша әлемнің денсаулық сақтау жүйесі үшін басты бағыт етіп айқындалды. Тұңғыш рет АМСК және оның басты қағидалары мен даму элементтері айқындалды.

Аталған конференция өзге елдермен тәжірибе алмасуға, алғашқы медициналық-санитарлық көмектің жаңа инновациялық жолдарын қамтамасыз ете отырып, денсаулық сақтау жүйесінің тиімділігін жақсартуға, сондай-ақ халық денсаулығына әсер ететін басқа да секторларды тарту, инновациялық технологиялар мен АМСК қызметін компьютерлендіру бойынша бұдан ары қарайғы ұстанымдарды анақтауға мүмкіндік бермек.

«Саламатты Қазақстан» мемлекеттік бағдарламасы АМСК жөніндегі Алматы декларациясының негізгі қағидаларымен толықтай үндес келеді.