Алматыда әйелді соққыға жыққан: полиция екі бап бойынша тергеуді бастады
АЛМАТЫ. ҚазАқпарат - Алматы полициясы әйелді ұрып-соғып және зорлауға әрекет жасаған ер адамдарға қатысты тергеуді бастады, деп хабарлайды ҚазАқпарат тілшісі.
«2019 жылы 29 желтоқсан күні Ж. есімді азаматша Түрксіб аудандық полиция басқармасына арызданған. Бұл факт сотқа дейінгі тергеудің бірыңғай тізілімінде ҚР Қылмыстық кодексінің 24- бабының 3- бөлігі және 120 бабы (зорлау) бойынша тіркелді», - деп хабарлады Алматы қалалық ПД баспасөз қызметі.
Оқиғаның мән-жайын анықтау үшін жедел тергеу тобы құрылды. Күдіктілер белгілі болды.
«Азаматша Ж-ның алған жарақатының ауырлығын анықтау үшін сот-медициналық сараптама тағайындалды. Сонымен бірге, жәбірленуші полицияға шағымданған күні С. есімді азаматқа арызданудан бас тартып, қарсы шағым жазғанын атап өткен жөн», - деп толықтырды Алматы қалалық ПД баспасөз қызметі
Естеріңізге сала кетейік, жұмыс орнына еңбекақысын алуға келген үш баласы бар әйелді әріптестері ұрып-соққан болатын.
