Алматыда меншік иелерінің бірлестіктерін құру бойынша ақпараттық орталық ашылды
АЛМАТЫ. ҚазАқпарат - Алматыда «Алсеко» акционерлік қоғамы ҚР ИИДМ Құрылыс және тұрғын үй-коммуналдық шаруашылық істері комитетінің қолдауымен арнайы ақпараттық орталықты іске қосты, деп хабарлайды ҚазАқпарат тілшісі.
ҚР Индустрия инфрақұрылымдық даму министрлігі Құрылыс және тұрғын үй-коммуналдық шаруашылық істері комитеті төрағасының орынбасары Бауыржан Қабдолдың айтуынша, аталған орталық Меншік иелерінің бірлестіктері, қарапайым серіктестік және пәтер иелері кооперативтері төрағаларына олардың қызметіне қатысты мәселелер бойынша, сондай-ақ тұтынушыларға ақпараттық және консультациялық қолдау көрсетеді.
«Цифрлық экожүйе шағымдар мен өтініштерді жіберу мүмкіндігі есебінен тұрғын үй-коммуналдық шаруашылық саласындағы қызметтердің сапасын арттыруға мүмкіндік береді. Меншік иелері ақпараттандыру объектілері арқылы үйді басқаруға қатыса алады, сондай-ақ үйдегі барлық жұмыс бойынша ашық деректерге қол жеткізе алады», - деп атап өтті ҚР Индустрия инфрақұрылымдық даму министрлігі Құрылыс және тұрғын үй-коммуналдық шаруашылық істер комитеті төрағасының орынбасары Бауыржан Қабдол.
Бұған дейін комитет төрағасының орынбасары, елдегі көппәтерлі үйлердің 90 пайыздан астамы басқарудың жаңа формасына көшкені туралы айтқан болатын.
