Анна Данилина Монтеррейде негізгі турнирге жолдама алды

АСТАНА. KAZINFORM —Қазақстандық теннисші Анна Данилина жекелей сында Монтеррей (Мексика) WTA 500 турнирінің іріктеу сайысын сәтті өткізді.

Дүниежүзілік рейтингіде 951-сатыда тұрған қазақстандық теннисші іріктеу сайыстарының финалында әлемнің 278-ракеткасы, Израиль өкілі Лина Глушконы жолдан тайдырды.

Бірінші партияда Данилина 6:3 есебімен басым түсті.

Екінші сетте есеп 3:3 болған мезетте Анна брейк жасап, сол басымдылығынан айырылған жоқ – 6:4.

Бір сағат 20 минутқа созылған бәсекеде Данилина 2 эйспен бірге 9 брейк-пойнттың үшеуін пайдаланды. Глушко 5 эйс, 1 брейкпен (4 брейк-пойнт) көзге түсті.

Осылайша, Анна Данилина Монтеррейде негізгі жарысқа жолдама алды. Мұны сенсациялық нәтиже деуге болады.

Еске сала кетейік, бұдан бұрын Юлия Путинцеваның Цинциннатиде жұптық сында алғаш рет WTA 1000 турнирінің финалына шыққанын жазған болатынбыз.

Сондай-ақ Анна Данилина Мексикада іріктеу турнирін сәтті бастады.