Аралас жекпе-жек: Жасұлан Әкімжан ресейлік қарсыласын нокаутқа жіберді

НҰР-СҰЛТАН. ҚазАқпарат - Қазақстандық аралас күрес шебері Жасұлан Әкімжан Eagle FC 50 турнирінде ресейлік Руслан Яманбаевты техникалық нокаутпен жеңді, деп хабарлайды ҚазАқпарат тілшісі.

Бірінші раунд қарсыластардың белсенді соққыларымен ерекшеленді. Соған қарамастан жерлесіміздің қарсыласы ресейлік күрес шеберінің есе жібермейтіні байқалды.

Раунд ортасына қарай Жасұлан Әкімжан қарсыласын тұншықтыру әдісі арқылы жеңбек болды, бірақ нәтижесіз аяқталды.

Екінші раундта отандасымыз белсенділік танытып табысты тейкдаун өткізді. Бұл сәт Яманбаевқа қиынға соқты.

Нәтижесінде төрешілер жекпе-жекті раундтың ортасында тоқтатты. Осылайша қазақстандық Жасұлан Әкімжан жарқын жеңіске жетті.

Айта кетсек, елордада аралас жекпе-жектен Хабиб Нурмагомедов турнирі өтті. Аталған бәсекеде жерлесіміз Кирилл Геккель төрешілердің шешімімен ресейлік Израиль Гаджиагаевқа есе жіберген еді .

Сондай-ақ, қазақстандық аралас жекпе-жек шебері Санжар Әділов ресейлік Чармигула Сиражудиновтен басым түсіп, жеңіске жетті .

Қазақстандық жекпе-жек шеберлерінің жеңісі жалғасын тауып Әли Қабдолла аталған турнирде тұншықтыру әдісі арқылы ресейлік Валерий Грицутиннен басым түсті .

Одан бөлек, Хабиб Нурмагомедов турнирінде жеңіске жеткен жерлесіміз Санжар Әділов болашақ мақсаты туралы айтып берді .