Аралдың құрғаған ұлтанындағы 15 мың гектар жерге сексеуіл егіледі
ҚЫЗЫЛОРДА. KAZINFORM — Биыл Арал теңізінің құрғаған ұлтанындағы 100 гектар жерде фитоорман-мелиорация жұмысы атқарылады.
Қызылорда облысының табиғи ресурстар және табиғат пайдалануды реттеу басқармасының мәліметіне сүйенсек, оның ішінде 15 мың гектар жерге сексеуіл көшеті егілсе, 85 мың гектар жерге галофитті тұқымдар себіледі.
— Облыс аумағында 7,3 млн гектар жер мемлекеттік орман қорына тиесілі. Оның 3,8 млн гектары — орманды алқаптар. Орман қорының санитарлық жағдайын бақылау үшін көктем және күз айларында 376,3 мың гектар жерге орман патологиялық зерттеу жұмысы жүргізіледі, — деді басқарма басшысының орынбасары Мәріп Акбар.
Дүниежүзілік банктің қайтарымсыз қаржысы есебінен Қазалы ауданында сексеуіл, саялы ағаш көшеттерін дайындау мақсатында 33,5 гектар аумақта тұрақты орман тұқымбағы құрылды.
2021 жылы Мемлекет басшысының тапсырмасы бойынша 1,1 млн гектар алқапқа сексеуіл егу жұмыстары басталды.
