Астана әкімдігі бөлген 526 грант педагогикалық мамандықтарға үлестірілді

АСТАНА. KAZINFORM —  Астана әкімдігінің қаулысымен 2025-2029 оқу жылдарына арналған жоғары және жоғары оқу орнынан кейінгі білімі бар кадрларды даярлауға мемлекеттік білім беру тапсырысы бекітілді. Бұл туралы елорда әкімдігінің ресми сайты жазды.

Педагогикалық мамандықтар бойынша 526 грант бөлінді. Оның ішінде жоғары оқу орындарына педагогикалық бағыттарда (педагогика және психология, математика, информатика, орыс тілі мен әдебиеті, физика, арнайы педагогика, психология) 265 грант орналастырылды. 

ҰБТ-дан өтіп, «Педагогикалық ғылымдар» бағыты бойынша кемінде 75 балл жинаған талапкерлер педагогикалық мамандықтар бойынша мемлекеттік білім беру грантына үміткер бола алды.

Астана қаласы Білім басқармасының мемлекеттік білім беру грантына құжаттарды қабылдау 7-17 тамыз аралығында жоғары оқу орындары арқылы жүргізілді. 

Нәтижелер 2025 жылғы 21 тамызда Астана әкімдігінің және қалалық Білім басқармасының сайттарында жарияланды.

Айта кетейік, бүгін Министрлік жүйедегі ақауларға байланысты колледждерге құжат қабылдау мерзімін ұзартты.