Астанада Білім берудің жоғары мектебі ашылады
АСТАНА. 20 тамыз. ҚазАқпарат - Бүгін Назарбаев университетінде басталған Жоғары білім беру саласы көшбасшыларының еуразиялық форумы аясында Білім берудің жоғары мектебін ашу жоспарланып отыр.
Назарбаев университетінің Білім беру саясаты орталығының директоры Аида Сағынтаеваның айтуынша, жаңа мектепте жоғары оқу орындарын басқарушы мамандар даярланатын болады. Олар отандық білім беру саласын реформалау жағдайында еңбек етпек. «Дәл осы Жоғары мектеп арқылы Назарбаев университеті білім беруді басқарудың озық тәжірибесін барлық республикаға таратады. Осы орайда атап өтер жайт - біз бұл мектепті Кембридж және Пенсильвания университеттерімен бірлесе отырып ашып отырмыз. Себебі олардың біреуі орта білімге бейімделсе, екіншісі жоғары білім беру саласын жақсы біледі. Осылайша, бір-бірінің жұмысын қайталамай, толықтырып отыратын әлемнің екі жетекші университеті Жоғары мектептің академиялық саясатына жауап береді. Олар магистратура бағдарламасын, оқу жоспарларын, мектептің басқарушы аппаратын жұмысқа қабылдау жұмыстарын атқарады. Қазіргі кезде мектеп деканы қызметке алынды. Жақын арада ол Астанаға көшіп келеді», - дейді А.Сағынтаева.
2013 жылы Жоғары мектепке алғашқы екі топ қабылданады. Оның әрбіреуінде 30 адам білім алады. Олар білім беру саласындағы магистратура бағдарламасы, ағылшын тілінде Master in Education бойынша білім алмақ. Онда екі мамандық бар. Біреуі - орта білім, екіншісі - жоғары. 2020 жылға дейін Жоғары мектептің 400-ден астам түлегін еңбек нарығына шығару жоспарланған. Докторантураның алғашқы түлектері де сол кезде оқуларын аяқтайды.
