Астанадағы ақылы тұрақтарды әкімдікке беру: басқару тетігі өзгеруі мүмкін

АСТАНА. KAZINFORM – «Астананың тұрақ кеңістігі» ЖШС елорда әкімдігінің меншігіне өткелі жатыр. Ақылы тұрақтар атқарушы органның теңгеріміне тіркелген соң қандай өзгеріс болады? Төлемақы арзандай ма? Тегін тұру уақыты ұзара ма? Kazinform тілшісі осы мәселені анықтап көрді.

— Қазіргі уақытта ақылы автотұрақтарды қала балансына коммуналдық меншікке беру және тоқтату жұмыстары жүргізіліп жатыр. Бұл шешім тұрақ инфрақұрылымын басқаруды жақсартуға және елордадағы тұрақ орындарын тиімдірек бақылауды қамтамасыз етуге бағытталған. Болашақта бұл тұрақ ұйымдастырудың жаңа тетіктерін енгізуге, сондай-ақ қала тұрғындары мен қонақтарына қызмет көрсету сапасын арттыруға мүмкіндік береді, - делінген елорданың Көлік және жол-көлік инфрақұрылымын дамыту басқармасының жауабында.

Сондай-ақ, хабарламада қазіргі уақытта тек «Астананың тұрақ кеңістігі» ЖШС-мен мемлекеттік-жекеменшік әріптестік шартын бұзу үдерісі жүріп жатқаны айтылған.

- Қазіргі уақытта ақпарат тек «Астананың тұрақ кеңістігі» ЖШС-мен МЖӘ шартын бұзу үдерісімен шектелген. Әрі қарайғы қадамдар мен өзгерістерге қатысты сұрақтар әзірге даму сатысында тұр және қазіргі уақытта оларға жауап беру мүмкін емес, - дейді басқармадан.

Ақылы тұрақтардың әкімдік қарамағына алынатыны жайлы кеше Астана қаласы әкімі Жеңіс Қасымбектің Есіл ауданының тұрғындарымен кездесуінде айтылды. Онда қала басшысы жеке компанияға жобаға салған қаржысына байланысты өтемақы берілетінін атап өтті. Бірақ әзірше нақты қандай сомада өтемақы берілетіні жайлы нақты мәлімет жоқ.

Бұған дейін басқарма 2025 жылғы ақылы тұрақ ақысына қатысты сауалға жауап берген еді.

Сондай-ақ депутат Астанадағы ақылы тұрақтарда 30 минут тегін тұру тетігін енгізуді ұсынған болатын.

Одан бөлек, Астанада әлі 2 800 орын ақылы тұраққа айналатыны айтылған.