Астанадағы өрт: жалынның таралуы тоқтатылды - ТЖК ресми өкілі
АСТАНА. ҚазАқпарат - Астанада Бизнес орталығында орналасқан дәмханадан шыққан өрттің таралуы тоқтатылды. Бұл туралы ҚР ІІМ Төтенше жағдайлар комитетінің ресми өкілі Руслан Иманқұлов мәлім етті, деп хабарлайды ҚазАқпарат.
«Оқиға орнына ҚР ІІМ Төтенше жағдайлар комитеті бөлімшелерінің 90-нан астам адамы және мамандандырылған 27 техникасы жұмылдырылды. Өртті сөндіру жалғасуда. Жалынмен күресті тиімді жүргізу үшін ғимараттың шатырын бұзу жұмыстары жүргізілуде», - деп атап өтті Иманқұлов.
Мәлім етілгендей, тілсіз жаумен күрес үшін 3 жауынгерлік учаске жасақталды, оқиға орнында өртпен күресті басқару жөніндегі жедел штаб жұмыс істеуде.
«Өрт сөндірушілердің күшімен сағат 01:43-те жалынның таралуы тоқтатылды. От шарпыған аумақ шамамен 400 шаршы метрді құрады», - деп хабарлады ресми өкіл.
Бұған дейін хабарлағанымыздай, 17 қыркүйек күні сағат 22:49-да Астана қаласы Бейбітшілік көшесіндегі төрт қабатты «Өркен» іскерлік орталығының астыңғы қабатында орналасқан «Драфт» дәмханасынан өрт шықты . Ас дайындау бөлмесінен шыққан от кейін ғимараттың шатырына ауысқан. 40 адам қауіпсіз жерге көшірілді.
