Астанадағы Саратов облысының күндері гала-концертпен тәмамдалды

АСТАНА. ҚазАқпарат - Астанадағы Саратов облысының күндері гала-концертпен аяқталды. Кешке жиналғандар Саратов облысының танымал әншілерінің әнін тыңдап, өнерін тамсана тамашалады.

Мәдени шара қонақтарын Болгариядағы халықаралық фестивальдің гран-при иегері, бүкіл ресейлік «Ресей дауысы» байқауының I сыйлығының лауреаты атанған «Колядки» ұлттық музыка ансамблі тосын сыйымен қуантты. «Қазақстан астанасына жасаған сапарымызда барлық саланы қамтып, тек іскерлік қарым-қатынаспен шектелмей, мәдени жақындастықты да ескере келдік. Үйренгеніміз де аз болмады. Енді көңілге тоқыған ойларды өз елімізде жүзеге асыруды қолға алатын боламыз», - деді Саратов облысының губернаторы Валерий Радаев. Кеш соңы Оксана Колчина, Михаил Журков және басқа да өнер жұлдыздарының орындауындағы «Саратов туралы ән» шығармасымен қорытындыланды, деп хабарланған елорда әкімдігінің ресми сайтында.