Астаналық оқушы зағип жандарға арналған ақылды көзілдірік ойлап тапты

АСТАНА. KAZINFORM — Астанадағы Қошке Кемеңгерұлы атындағы № 49 мектеп-гимназиясының 10 «А» сынып оқушысы Қуандық Әмірхан ерекше жобасын таныстырды. Ол көру қабілеті нашар және мүлде көрмейтін жандарға арналған ақылды көзілдірік жасап шығарды, деп хабарлайды елорда әкімдігі.

— Жас өнертапқыштың бұл жобасы көзі нашар көретін адамдарға күнделікті өмірде көшеде еркін қозғалып, түрлі кедергілерден сақтануға мүмкіндік береді. Ақылды көзілдіріктің басты ерекшелігі — адамның алдында бір метр қашықтықтан бастап кедергі пайда болғанда, алдын ала қазақ тілінде «Сақтаныңыз, алдыңызда кедергі!» деген дауыстық ескерту жасайды, — делінген әкімдік таратқан ақпаратта.

Қуандық Әмірхан бұл көзілдірікті зағип жандардың қауіпсіздігін қамтамасыз ету мақсатында құрастырғанын айтады. Алдағы уақытта ол жұмыстың ауқымын кеңейтіп, басқа да нұсқамаларды енгізуді көздеп отыр.

Ведомство атап өткендей, бұл бастама — жас өнертапқыштың ғылым мен технология саласына деген қызығушылығының нәтижесі ғана емес, сонымен қатар әлеуметтік жауапкершілік пен жанашырлықтың үлгісі. Ақылды көзілдірік әлеуметтік маңызы зор жаңалық ретінде қоғамның қолдауына ие болары сөзсіз. Жоба зағип жандардың өмір сүру сапасын арттырып, олардың өз бетімен қозғалуына үлкен септігін тигізбек.

Осыдан бұрын елордада оқушылар 400-ге жуық қақпақтан Қазақстан картасын жасағанын жазған едік.