Атырау волонтерлері абаттандыру жобасынан 14 млн теңгенің бұзушылығын анықтады
Атырау волонтерлері «100 алаңды абаттандыру» жобасы аясында футбол және балаларға арналған ойын алаңдарының құрылысына мониторинг жүргізді. Мониторинг кезінде 14 млн теңгеден астам қаржы бұзушылығы анықталған, деп хабарлайды Kazinform агенттігі.
Сыбайлас жемқорлыққа қарсы іс-қимыл агенттігі Атырау облыстық департаменті баспасөз қызметінің мәліметінше, волонтерлер мұнайлы шаһардың Балықшы шағын ауданында анықталған кемшілікке байланысты уәкілетті мемлекеттік органдарға eOtinish сервисі арқылы хат жолдаған. Сондай-ақ, жергілікті Антикорға ақпарат берілген.
– Волонтерлер «100 алаңды абаттандыру» жобасы аясында футбол және балалар алаңдарына жүргізілген мониторинг кезінде 14 млн теңгеден астам қаржы бұзушылықтарын анықтады. Мәселен, А.Құнанбаев, Әшенов көшелерінде жарық жоқ. Ал, сымдар ашық күйде қалған. Тұрғын үй алабындағы аулада тастар шашылып жатыр. Балалардың ойын, футбол алаңдары аяқталмаған. Мемлекеттік органдардан сұратылған құжаттарда еріктілер көрсеткен жетіспеушіліктер орындалған жұмыстардың қол қойылған актілерінде бар екені анықталды. Атап айтқанда, 16 металл жарықтандыру тірегі, 19 көшенің шамдары, мүгедектерге арналған тұрақ белгілері, бір жақты шаршы жол белгілері, жол белгілеріне арналған дөңгелек металл тіректер, сондай-ақ, резеңке үгінділерден жасалған орам жабыны бар деп көрсетілген. Абаттандыруға қатысты құрылыс-монтаждау жұмыстары үшін «Риголит» ЖШС-мен 500 млн теңгенің келісімшарты жасақталған. Жұмыстың аяқталу мерзімі – 2023 жылдың қараша айы, - деп хабарлады департаменттің баспасөз қызметі.
Еріктілердің үйлесімді жұмысының нәтижесінде анықталған бұзушылықтар жойылды. Көшелерге жарықтандыру жүргізілді. Жол белгілері орнатылды, резеңке үгінділерден жасалған орам жабыны жайылды.
Еске сала кетелік, бұдан бұрын Атырау облысында аудандық әкімдік көшетті үш есе қымбатқа сатып алмақ болғанын жазған едік.
