Атырауда мотоциклмен шана сүйреген браконьерлерден 530 келі балық тәркіленді
АТЫРАУ. KAZINFORM – Каспий теңізінің жағалауына жақын орналасқан Жанбай ауылының маңында 4 адамнан 530 келі балық тәркіленді. Олар балық салынған шананы мотоциклмен сүйреп келе жатқан.
Атырау облыстық полиция департаментінің баспасөз қызметінен мәлім еткендей, Исатай ауданында «Урал» мотоциклі тоқтатылған. Мотоциклге тіркелген шанада заңсыз ауланған балық болған.
– Облыс аумағында 1-28 ақпан аралығында табиғи ресурстарды заңсыз айналымнан қорғау мақсатында кең ауқымды «Браконьер» жедел-профилактикалық іс-шарасы өткізіліп жатыр. Осыған орай Исатай ауданындағы Жанбай ауылы маңында рейдтік іс-шара кезінде шана сүйреп келе жатқан «Урал» мотоциклі тоқтатылды. Мотоциклде 4 адам, шанада 10 қапқа салынған 530 келі балық болған. Заңсыз балық аулаушылардан 2 пышақ, 2 дана радиоқабылдағыш табылды. Тәркіленген балық «Тілекші» ЖШС-нің цехына тапсырылды, -деп хабарлады департаменттің баспасөз қызметі.
Қазір аталған дерек бойынша ҚР Қылмыстық кодексінің 335-бабының 3-бөлігінің 4-тармағымен қылмыстық іс қозғалды. Полиция қызметкерлері тергеу амалдарын жүргізіп жатыр.
– Азаматтарды табиғатқа зиян келтіретін заңсыз әрекеттерден бас тартуға шақырамыз. Браконьерлік әрекеті үшін қылмыстық жауапкершілік қарастырылғанын ескертемыз, -деп мәлім етті департаменттің баспасөз қызметінен.
Еске сала кетелік, бұған дейін Атырауда заңсыз балық аулаған браконьерлер мотоциклін тастап қашып кеткенін жазған болатынбыз.
