Атырауда пәтердегі өрттің түтінінен уланған зейнеткер көз жұмды

АТЫРАУ. KAZINFORM – Атырау қаласында 2 қабатты тұрғын үйдегі пәтер өртенді. Түтіннен уланған зейнеткер оқиға орнында қайтыс болды.

Атырау облыстық төтенше жағдайлар департаментінің имидждік жұмыс және сыртқы коммуникациялар тобынан мәлім еткендей, өрт бүгін, 5 наурызда болған.

– Құтқару қызметінің байланыс бекетіне таңертеңгі сағат 07:32-де Атырау қаласындағы М.Әуезов көшесінде орналасқан тұрғын үйден түтін шыққаны туралы шақырту түсті. Өрт сөндіру қызметінің құтқарушылары санаулы минутта шақырту орнына жетіп, 1-қабаттағы пәтердің өрттенгенін анықтады. Пәтер есігі құлыптаулы болғандықтан, құтқарушылар терезеден кіріп, барлау жұмысын жүргізді. Нәтижесінде пәтердің қонақ бөлмесінен 1952 жылғы зейнеткер әйелді тауып, таза ауаға шығарды. Апаттар медицинасы орталығының дәрігерлері әйелдің түтін иісінен уланып, қайтыс болғанын тіркеді, - деп мәлім етті имидждік жұмыс және сыртқы коммуникациялар тобы.

Пәтердегі өрт сағат 07:58-де толық сөндірілді. Жалынды сөндіруге төтенше жағдайлар департаментінен 6 қызметкер, 2 техника жұмылдырылды.

Еске сала кетелік, бұған дейін Атырау облысында үй аралап жүрген учаскелік полицей 70 жастағы қарияны өрттен алып шыққанын жазған болатынбыз.