Атырауда сұйытылған мұнай газын сақтайтын компания негізсіз кіріс тапқан
АТЫРАУ. KAZINFORM — Атырауда «Сұйытылған мұнай газын сақтау паркі» ЖШС тарифтік сметаны орындауда бұзушылыққа жол берген. Сөйтіп, негізсіз кіріс тапқаны анықталды.
Табиғи монополияларды реттеу комитеті Атырау облысы бойынша департаментінің мәліметінше, компанияның 2023 жылға бекітілген тарифтік сметалардың орындалуы туралы есебіне талдау жүргізілген.
— Талдау қорытындылары бойынша «Сұйытылған мұнай газын сақтау паркі» ЖШС-мен уәкілетті органның ведомствосы тарифтік сметада бекітілген тарифтік смета шығындары баптарының бекітілген тарифтік сметада көзделген мөлшердің 5% астамын орындамауы анықталды. ҚР Табиғи монополиялар туралы Заңының 26-бабының 2-тармағының 15) тармақшасына сәйкес табиғи монополия субъектісі бекітілген тарифтік сметаны орындауға міндетті болатын. Алайда бұл талап бұзылып, «Сұйытылған мұнай газын сақтау паркі» ЖШС-ның реттеліп көрсетілетін қызметі бойынша бекітілген тарифтік смета шығындары баптарының бекітілген тарифтік сметада көзделген мөлшердің 5 пайызынан астамын орындамауы негізсіз алынған кірістің жалпы сомасы 189,91 мың теңгені құрады. Қазақстан Республикасы Ұлттық Банкінің базалық мөлшерлемесі ескеріліп, жалпы сомасы 218,88 мың теңге анықталды, — деп хабарлады департаменттен.
Осыған байланысты жергілікті департаменті 2025 жылдың 1 сәуірі мен 2026 жылдың 31 наурызы аралығында тарифті төмендетті. Осы кезеңге уақытша тариф бекітілді.
— «Сұйытылған мұнай газын сақтау паркі» ЖШС-нің бәсекелес кірме жолы болмаған жағдайда жылжымалы құрам өтуі үшін кірме жолды беру қызметіне уақытша өтемдік тарифі қосымша құн салығынсыз 7,79 теңге көлемінде бекітілді. Бұрынғы қолданыстағы тариф 16,9 теңге еді. Осылайша тариф 53,91 пайызға төмендетілді. Компанияға ҚР Әкімшілік құқық бұзушылық туралы кодексінің 164-бабының 4-бөлігі бойынша 1 млн 258 мың 240 теңге айыппұл салтынды. Субъект әкімшілік іс бойынша салынған айыппұлды 7 күн ішінде 50% мөлшерінде төледі, — деп мәлім етті департаменттен.
Еске сала кетейік, бұған дейін Атырауда компанияларға салынған 42 млрд теңге айыппұлдың 26 млрд теңгесі өндірілгенін жазған едік.
