АТЫРАУ ОБЛЫСЫНДАҒЫ ТЖ ОРНЫНАН ФОТО

АСТАНА. ҚазАқпарат - Атырау облысындағы төтенше жағдайдың мән-жайы белгілі болды. Кеше кешкісін «Алматы - Атырау» бағыты бойынша бет алған № 41 жолаушылар пойызының 12 вагоны жолдан шығып кеткен болатын. Апат Жантерек пен Еңбай разъездерінің арасында (Мақат кентінен шамамен 80 шақырым жерде) орын алды.

Пойыздың құрамында 19 вагон болған, оның 16-ы жолаушыларға арналған. Ал рельстен 13 вагон шығып кетті.

Аталмыш пойызда 586 жолаушы болған, оның 35-і қызмет көрсетуші жұмыскерлер. Аударылып қалған вагондарда 210 жолаушы мен 12 жолсерік болды.

«44 жолаушыға медициналық көмек көрсетілді, оның 21-і ауруханаға жеткізілді. Қазіргі кезде жолаушылардың барлығы оқиға орнынан қауіпсіз жерге шығарылды» делінген Көліктегі ІІД баспасөз қызметі таратқан хабарламада.

Ал, ҚР ТЖМ-нің мәліметінше, түрлі жарақат алған 8 жолаушы Атырауға, ал қалғандары автобуспен Мақат стансасына дейін жеткізілді.

ТЖ-дан кейін оқиға орнына 69 құтқарушы, 12 арнайы техника, 2 тікұшақ және 2 қалпына келтіру пойызы бағытталды. Медициналық көмек көрсету мақсатында 45 дәрігер мен 6 жедел-жәрдем бригадасы және 4 психолог жұмылдырылды. Сондай-ақ қоғамдық қауіпсіздікті қамтамасыз ету жұмысына 160 полицей тартылды.

Оқиға орнында апаттан кейін қалпына келтіру жұмыстары жүргізілуде, деп хабарлайды ҚР ТЖМ. Бұл мақсатта жұмысқа бас-аяғы 218 маман, 22 техника, 8 электрсансасы мен Мақат пен Қандыағаш стансаларынан қалпына келтіру пойыздары жұмыс істеп жатыр.

Жолаушылар пойыздарының қозғалысы толығымен реттелді. Апат кезінде 325 метр теміржол зақымданған. Осы төтенше жағдай салдарынан 9 жолаушы және 34 жүк пойызы уақытынан кешіктірілді.

ТЖ орнында жедел-тергеу тобы жұмыс істеп жатыр. Аталған факті бойынша ҚР Қылмыстық кодексінің 295-бабының 1-тармағымен қылмыстық іс қозғалды.