Атырауда демеушілер науқас бүлдіршінге оттегі аппаратын сыйға тартты
АТЫРАУ. ҚазАқпарат – Атырауда демеушілер науқас бүлдіршінге оттегі аппаратын сыйға тартты. Оттегі аппаратын 5 жылға дейін пайдалануға болады, деп хабарлайды ҚазАқпарат тілшісі.
Өңірлік коммуникациялар қызметінің мәліметіне сүйенсек, демеушілік көмектің ұйымдастырылуына облыстық денсаулық сақтау басқармасы ұйытқы болған.
Ал, 6 жасар Раяна Құбышева туғаннан оттегі аппаратына тәуелді. Сол себептен, ата-анасы оны облыстық балалар ауруханасына жиі әкеледі. Облыстық денсаулық сақтау басқармасының өтінішімен «Артель Инжиниринг» компаниясы Рая Құбышеваға оттегі аппаратын сыйға тартты.
Ресей Федерациясынан шығарылған оттегі аппаратының құны – шамамен 500 мың теңге. Оттегі аппаратын 5 жылға дейін пайдалануға болады.
«Біздің компания облыстық денсаулық басқармасымен бірлесіп, қайырымдылық жобаларын атқарып келеді. Сондай мақсатпен оттегі аппаратына мұқтаж 6 жасар бүлдіршінге сый жасадық. Әрине, мұндай қымбат құрылғыны алуға бәрінің жағдайы жетпейді. Оған қоса, ауруханаға жиі қатынау да қиындық тудырады. Осындай қайырымдылық шараларын алдағы уақытта тағы жалғастырамыз», -дейді «Артель Инжиниринг» компаниясының бөлім басшысы Алёна Сергеева.
Еске сала кетелік, бұған дейін Қазақстан халқына қоры Атырау облысында 2 спорт залды жабдықтап беретінін жазған болатынбыз.
