Australian Open: Данилина жарыстың 1-ракеткасын жеңіп, жартылай финалға шықты

АСТАНА. KAZINFORM – Қазақстанның жұптық сындағы бірінші, әлемнің 14-ракеткасы Анна Данилина Аустралия ашық чемпионатының жартылай финалына өтті.

Қазақстандық теннисші сербиялық Александра Круничпен бірге ширек финалда жарыстың 1-ракеткалары, чехиялық Катержина Синякова – америкалық Тэйлор Таунсендке қарсы келді.

Қазақстандық-сербиялық жұп матчты қарқынды бастады – 6:2.

Екінші сетте чехиялық-америкалық дуэт есе қайырды – 6:3.

Үшінші, шешуші партияда Данилина – Крунич бет қаратпады – 6:0.

Бір сағат 38 минутқа созылған бәсекеде Анна – Александра 1 эйспен бірге 6 брейк-пойнттан шашау шығарған жоқ. Синякова – Таунсенд 2 брейктен (5 брейк-пойнт) аса алмады.

Анна Данилина – Александра Крунич финалға шығу үшін доданың 5-ракеткалары, канадалық Габриэла Дабровски – бразилиялық Луиза Стефанимен таласады. Бұл жұп ширек финалда аталмыш чемпионатта 3-ракетка болып тіркелген тайбэйлік Се Шувэй – латвиялық Елена Остапенконы қапы қалдырды – 6:1, 7:6 (7:5). 

Еске сала кетейік, бұдан бұрын Аустралия ашық чемпионатында Рыбакинаның әлемнің 2-ракеткасын ұтып, жартылай финалға өткенін жазған едік.

Сондай-ақ Заңғар Нұрланұлы алғаш рет ширек финалға шықты.