Азия чемпионатында стенд атудан Қазақстан жасөспірімдер құрамасы алтын алды

АСТАНА. KAZINFORM -  Шымкент қаласында өтіп жатқан XVI Азия чемпионатында стенд атудан Қазақстан жасөспірімдер құрамасы алтын медаль алды.

Трап бағдарламасындағы аралас жұптық сында Элеонора Ибрагимова мен Никита Моисеев финалда үндістандық қатарластарынан 38: 37 есебімен басым түсті. Екінші орынға Үндістан жайғасса, үздік үштікті Өзбекстан түйіндеді.

Айта кетейік, осыған дейін Никита мен Элеонора ерлер мен әйелдер арасында командалық сайыста күміс жүлде иеленді.

Құрлықтық додаға 29 елден 756 спортшы келді. Олар екі аптаға жуық уақыт бойы жүлделерді сарапқа салады.

Айта кетсек, бұдан бұрын ерлер арасында 10 метрден аралас ырғақта жылжымалы нысана көздеуден Қазақстан-1 жасөспірімдер командасы топ жарды. Рамазан Хусаинов, Шахзод Ирназаров пен Валат Мусаев үштігі 1065 ұпай жинады.

Бұл - жасөспірімдер арасындағы жаңа Азия рекорды. Мұнда күміс Қазақстан-2 командасына, қола Өзбекстанға бұйырды.

Шымкент қаласы төрт жыл бұрын пневматикалық қарумен нысана көздеуден Азия чемпионатын қабылдаған еді. Онда 20 мемлекеттің 350-ге жуық спортшысы қатысты. Қазақстан 5 алтын, 7 күміс және 6 қола медальмен жалпы есепте 1-орын алды.