Бангладеш соты тәртіпсіздіктен кейін жұмысқа орналастыру квотасын жойды

АСТАНА. KAZINFORM— Бангладештің Жоғарғы соты 100-ден астам адамның өмірін қиған жаппай толқулар тудырған мемлекеттік сектордағы жұмыс квоталарының көпшілігін жойды, деп жазады ВВС.

Мемлекеттік сектордағы жұмыс орындарының үштен бірі 1971 жылы Пәкістаннан шыққан тәуелсіздік соғысы ардагерлерінің туыстарына бөлінген. Бірақ қазір сот оларға орынның тек 5%-ын ғана бөлуге болады деп шешті.

Жоғарғы соттың қаулысына сәйкес, мемлекеттік сектордағы жұмыс орындарының 93%-ы кәсіби жарамдылығына қарай адамдармен, 5%-ы революциялық соғыс ардагерлерінің отбасы мүшелеріне, ал қалған 2%-ы этникалық азшылық өкілдеріне немесе мүгедектерге тағайындалуы керек.

2018 жылы премьер-министр Шейх Хасинаның үкіметі күшін жойған квота жүйесін маусым айында төменгі сот қалпына келтіріп, жұртшылық наразылығын туғызды.

Үкімет бұл қаулыға әлі жауап қайтарған жоқ. Бірақ квотаны сақтағысы келгендердің мүддесін қорғайтын заңгер Шах Манджурул Хаке Жоғарғы сот шешімін тарихи шешім деп атап, сабырға шақырды.

Ел астанасы Даккада екінші күннен бері коменданттық сағат жарияланды, бірақ кейбір аудандарда оқшауланған қақтығыстар әлі де болып жатыр. Жоғарғы сот ғимаратының алдында бронетранспортер тұр, ал сарбаздар елорда көшелерін әлі де патрульдеуде, деп хабарлайды Reuters.

Наразылық білдірушілердің кейбірі тұтқындалғаны хабарланды. Басқалары қақтығыс кезінде қаза тапқандар үшін әділдік талап етуде.

Тәртіпсіздік салдарынан 115-ке жуық адам қаза тапты деген болжам бар, бірақ жергілікті ақпарат құралдары құрбан болғандардың саны бұдан да көп деп хабарлады. Олардың айтуынша, тек жұма күні кем дегенде 50 адам қайтыс болды.

Үкімет қатаң шаралар қабылдады, атап айтсақ, коменданттық сағат жарияланып, байланыс үзілді.