Бас мүфти Құрбан айтқа байланысты кәсіпкерлерге үндеу жасады
АСТАНА. KAZINFORM – Бүгін Астанада Құрбан айт мерекесіне байланысты өткен баспасөз мәслихатында Бас мүфти Наурызбай қажы Тағанұлы кәсіпкерлерге үндеу жасады. Бұл туралы Қазақстан мұсылмандар діни басқармасының баспасөз қызметі мәлім етті.
Бас мүфти мал құнын қолдан көтермей, халыққа қолжетімді бағаға сатуға шақырды.
– Қожа Ахмет Ясауи бабамыз бір даналық сөзінде Хаққа қызмет халыққа қызмет етуден басталатынын айтқан. Бұл – халықтың разылығы Хақтың разылығында деген сөз. Осы ретте еліміздегі барша шаруа қожалығының қожайындарын мал құнын қолдан көтермей, халыққа оңтайлы бағаны ұсынуға шақырамын. Әрине, еңбектің ақталғаны жақсы. Дегенмен біз «пайда ойлама, ар ойла» деген қанатты сөзге мән берген халықпыз. Алла Тағала халыққа жасаған жақсылықтарыңызды өздеріңізге еселеп береді. Өйткені Жаратушы Жаббар Иеміз Құранда «Әрбір жақсы нәрседен жасаған қайыр-садақаларың (сауабы) өздеріңе толық қайтарылады, сендерге әділетсіздік істелмейді» деп, мұсылман баласын зор қуанышты хабармен сүйіншілеген («Бақара» сүресі, 272-аят). Сонымен қатар барша кәсіпкерді тұрғындар күнде тұтынатын әлеуметтік маңызы бар азық-түлік бағасына мүмкіндігінше жеңілдік жасауға үндеймін. Алланың рақым нұры төгілетін Құрбан айтта жұртымызға жақсылық жасап, көпшіліктің алғысын алайық, ағайын! - деп атап өтті Наурызбай қажы Тағанұлы.
Айта кетейік, Құрбан айт мерекесі 6 маусымда басталады.
– Биыл қасиетті Құрбан айт мерекесі 6 маусымда басталады. Қазақстан мұсылмандары діни басқармасы бірқатар алыс та жақын мұсылман елдердің ғұламаларымен, пәтуә шығару орталықтарымен кеңесіп, осындай пәтуә қабылдады, - деді Бас мүфти ҚМДБ-да өткен баспасөз мәслихатында.
