Басқа елдер Кеден одағына бұған дейін қол қойылған шарттардың негізінде қосыла алады - ҚР Премьер-Министрі

АСТАНА. Мамырдың 31-і. ҚазАқпарат /Мұратбек Мақұлбеков/ - Басқа елдер Кеден одағына, бұған дейін қол қойылған шарттардың негізінде қосыла алады. ҚР Премьер-Министрі Кәрім Мәсімов Санкт-Петерборда өткен Кеден одағы жоғарғы органының мәжілісінен кейінгі баспасөз мәслихатында осындай мәлімдеме жасады.

«Кеден одағына басқа да елдердің қосылуына мүдделілік білдіреміз, олар бұған дейін қол қойылған шарттардың негізінде қосыла алады», - деді К.Мәсімов.

Ресей Премьер-Министрі Владимир Путин өз кезегінде, Кеден одағына, одан кейін Бірыңғай экономикалық кеңістікке қосылуға ЕурАзЭҚ-тың көптеген мүшелері ниет білдіргенін айтып өтті. Оның айтуынша, қазіргі таңда аталған елдердің ықпалдастыққа экономикалық дайындықтары туралы мәселе туындап отыр. В.Путиннің айтуынша, ықпалдастық үшін экономикалық база біртіндеп құрылып келеді.