Батыс Қазақстанда ауыл әкімі рульге масаң күйде отырған
ОРАЛ. KAZINFORM — Батыс Қазақстан облысы Ақжайық ауданында ауыл әкімінің рульге масаң күйде отырғаны белгілі болды.
БҚО полиция департаментінің баспасөз қызметінен мәлім еткеніндей, патрульдік полиция батальоны қызметкерлерімен Чапаев ауылы маңында көлік құралын алкагольдік масаң күйде басқарған жүргізуші анықталған.
— Аталған дерек бойынша Қазақстан Республикасы Әкімшілік құқық бұзушылық туралы кодексінің 608-бабына сәйкес әкімшілік хаттама толтырылды. Материалдар сотқа жолданды, — деп хабарлады ведомстводан.
БҚО сотының баспасөз қызметі істің сотқа түскенін жеткізді.
Еске сала кетейік, бұдан бұрын БҚО-да жасөспірімді зорлады деген күдікпен ұсталған бұрынғы шенеуніктің көз жұмғанын жазған болатынбыз.
