Биыл Атыраудан Ресей шекарасына дейін қатынайтын жолды жаңғырту аяқталады

АТЫРАУ. KAZINFORM – Биыл Атыраудан Ресей Федерациясының шекарасына дейін қатынайтын жолды жаңғырту жобасын аяқтау көзделіп отыр. 

Көлік министрі Марат Қарабаевтың мәліметінше, қазір аталған бағыттағы жолмен тәулігіне 5 мыңға жуық автокөлік өтеді. Жол пайдалануға берілгеннен кейін көлік ағыны 75%-ға артады.

«Биыл Атырау қаласынан Ресей Федерациясындағы Астрахань өңірімен шекараға дейін қатынайтын жолды жаңғырту жобасы аяқталады. Қайта құру жұмыстарымен қамтылған жолдың жалпы ұзындығы 212 шақырымды құрайды. Қазір мердігерлер асфальттың соңғы жоғарғы қабатын төсеп жатыр. Жол құрылысына 612 маман мен 408 арнайы техника жұмылдырылды», - деді Марат Қарабаев.

Министрдің дерегіне қарағанда, аталған жолды жаңғырту жобасы аяқталған соң көлікпен жүріп өту уақыты 2,5-3 сағатқа дейін қысқарады. 

Бұл жолды қайта жаңарту жұмыстары 2019 жылы басталған. 2021 жылы Құрманғазы ауданының орталығынан Ресей Федерациясының шекарасына дейінгі 60 шақырым жолды жөндеу аяқталған. Ал 2020 жылдан бері Құрманғазы ауылынан Атырау қаласына дейінгі 217 шақырым жол бөлігін жөндеу жұмысы жалғасып келеді.

Еске сала кетелік, бұдан бұрын Атырауда жүк вагондарын шығаратын зауыт іске қосылғанын жазған едік.