Биыл балалар мен жасөспірімдер қозғалысын дамытудың жаңа тәсілдері қабылданады

АСТАНА. KAZINFORM – Балалар мен жасөспірімдер қозғалысын дамытуға арналған концептуалдық тәсілдер жобасы әзірленіп жатыр. Бұл туралы Мәжіліс депутаттарының сауалына Премьер-Министрдің орынбасары Ермек Көшербаевтың жауабында айтылған.

- Балалар мен жасөспірімдер қоғамдық қозғалысы 3,5 миллионнан астам баланы қамтиды. Оның ішінде 415,9 мың бала оқушылардың өзін-өзі басқару органдарына (мектеп парламенттері) тартылған. Бұл қозғалыс оқушылар арасында құқықтық сауаттылықты қалыптастыруға ықпал етеді және 9 негізгі бағытты (интеллектуалдық, патриоттық, құқықтық, экологиялық, спорттық-сауықтыру, мәдениет және өнер, ғылымитехникалық, ақпараттық, еріктілік) қамтиды, - деді Ермек Көшербаев жауабында.

Вице-премьердің атап өтуінше, елімізде Балалар мен жасөспірімдер қозғалысын дамыту жөніндегі республикалық үйлестіру кеңесі құрылды. Жыл сайын балалар қозғалысына қатысушылар қатары 100-150 мың оқушымен (2023 жыл – 2,8 млн, 2024 жыл - 2,9 млн, 2025 жыл – 3,0 млн) толықтырылады.

- Қазіргі уақытта Оқу-ағарту министрлігі балалар мен жасөспірімдер қозғалысын дамытуға арналған концептуалдық тәсілдердің жобасын әзірлеуде. Ол осы жылдың соңына дейін бекітіледі, - деді Үкімет басшысының орынбасары.

Айта кетейік, «Жас Ұлан» қозғалысы 1,5 млн баланы, шығармашыл жастардың экологиялық қозғалысы «Жер елшілері» - 23 мың оқушыны біріктіреді. Республикалық «Жас сарбаз», «Жас бүркіт», «Жас құтқарушы» қозғалыстарында 170 мыңнан астам, дебаттық қозғалыста 194 084 бала бар.

Бұған дейін балалардың құқығын қорғайтын бөлек басқарма құрылғанын жазған едік.