Биыл балаларға арналған 1 691 нысан ашылды – вице-министр

АСТАНА. ҚазАқпарат – Балаларға арналған инфрақұрылымды дамыту мақсатында биыл елімізде 1 691 нысан ашылды. Бұл туралы БАҚ өкілдерінің қатысуымен өткен брифингте Оқу-ағарту вице-министрі Ғани Бейсембаев айтты, деп хабарлайды ҚазАқпарат тілшісі.

«Балалар инфрақұрылымын жақсарту, аула алаңдарын дамыту және жаңа заманауи нысандар салу, олардың әл-ауқатын арттыру бағытында биыл елімізде 1 691 нысан ашылды. Оның ішінде 38,9 мың орынға 458 мектепке дейінгі ұйым ашылса, жыл басынан бері 153 мың оқушы орнына арналған 254 жаңа мектеп пайдалануға берілді. Мемлекет басшысының тапсырмасымен 2023-2025 жылдары мектепке дейінгі ұйымдарда 222 мыңнан астам жаңа орын ашу жоспарланса, 2023 жылы 81 мың орындық мектеп ашу қарастырылған», - деп мәлім етті Ғани Бейсембаев.

Оның айтуынша, келер жылдан бастап заманауи 100 оқушылар сарайы, музыка және өнер мектептері, оқушылар үйлері мен қала сыртындағы 50 жаңа сауықтыру лагерлерінің құрылысы басталады.