Биыл мемлекеттік грант саны 800-ге қысқарды - Т.Балықбаев
АСТАНА. ҚазАқпарат - Биыл мемлекеттік грант саны 800-ге қысқарды. Бұл туралы бүгін ҚР Білім және ғылым вице-министрі Тахир Балықбаев мәлім етті.
«Былтырғы жылмен салыстырғанда биылғы жылы гранттың саны сол деңгейде қалды деп айтуға болады. Дегенмен 800 адамға азайды. Ол кейбір мамандықтарға мемлекеттік тапсырысты магистратураға ауыстыруымызға байланысты орын алды», - деді.
Т.Балықбаевтың атап өтуінше, мүгедек, жетім балаларға және шетелден келген балаларға арналған арнайы квоталар өткен жылғы деңгейде қалып отыр. Яғни, бөлінген мемлекеттік гранттың 1 пайызы І және ІІ топтағы мүгедектер, бала кезінен мүгедектер, мүгедек балалар тобындағы азаматтарға, 2 пайызы Қазақстан Республикасының азаматтары болып табылмайтын ұлты қазақ адамдарға, 1 пайызы жетім балалар мен ата-аналарының қамқорлығынсыз қалған балаларға беріледі.
Естеріңізге сала кетейік, ағымдағы жылы шамамен 34 мың грант бөлінеді. Оның шамамен 12 мыңы техникалық мамандықтарға бес мыңға жуығы педагогикалық мамандықтарға, шамамен 2600-і ауыл шаруашылығы мамандықтарына беріледі.
